كل سنة وانت طيب

كل سنه وانت طيب جمله معروفه بنقولها فى كل مناسبة زى العيد.. رمضان.. عيد الأم.. عيد الميلاد.. أى مناسبة حلوة، ولكن الغريب ان هذة الجمله لم تعد تقال فى المناسبات فقط كما اعتدنا فقد اصبح لها معانى واستخدمات اخرى غير المعنى الجميل الذى خصصت من اجله.

فلا تندهش عندما تدخل سينما او مسرح مثلا وتجد من يقول لك كل سنة وانت طيب على الرغم من انه لاتوجد أى مناسبة ولكن ما عليك فعله هو ان تقوم بترجمة فورية للجمله وتفهم فورا انه بيطلب فلوس والفلوس دى لاتندرج تحت اى مسمى ولكنها اصبحت اجبارية حتى تضمن الجلوس فى مكان مريح وكل ماهتدفع اكتر هتستريح اكتر.

اما اذا كنت بتتكلم مع حد فى موضوع وفجأة يقولك يا عم انت لسة فاكر ما خلااااص كل سنه وانت طيب، وهنا تفهم ان الموضوع انتهي من زمان، أو عندما تذهب للدكتور او اى مكان وتلاقيه زحمة وانت طبعا عايز تخلص فكل الى عليك أن تخرج من جيبك اللى فيه النصيب وتضعهم فى يد المسئول عن الدخول وقل له كل سنة وانت طيب وهتلاقى كل حاجة بقت تمام .

واحيانا تدخل محل تشترى حاجة وفجأة تصطدم بالأسعار ولما تسأل يرد عليك البائع احنا فى موسم .... كل سنة وانت طيب.

بس السؤال ليه كل سنه وانت طيب ؟