© ¶ابوكريم كركر¶©
نائب-المدير-العام
المساهمات : 144
تاريخ التسجيل : 13/12/2007
العمر : 47
 | موضوع: أنا أقوي من العفريت !!  الجمعة ديسمبر 14, 2007 3:13 pm | |
| هممت بالخروج عندما لا حظت نظرات إبني التي ترمقني
بخوف ثم ما لبس أن سألني : علي فين يا بابا ؟
رفعته من علي الأرض وقبلته ثم جاوبته : رايح الشغل عايز حاجة ؟
سألني وعينيه تبكي : وهتسيبني لوحدي ؟
رددت : إنت خايف ؟
- أيوه .
- من إيه ؟
- العفريت .
- مفيش عفاريت يا حبيبي .
- لأ فيه
- هي فين ؟ أنا مش شايف حاجة .. شاور لي عليها وأنا أضربه .
- لا العفريت قوي وهيضربك .
- لا يا حبيبي أنا أقوي من العفريت .
- طيب مين الأقوي ربنا ولا السيطان .
- ربنا طبعاً أقوي من الكل... ده هو اللي خلقنا .
- مس السيطان عينه حمرا وبياكل الناس .
- وأنا أداعبه .. وإنت شوفت الشيطان فين يا مفعوص .
- - وهو يحاول إدخال إصبعه في عيني - في الفيلم أكل الست وسرب دمها كمان .
- لا يا حبيبي ده اسمه دراكولا مصاص الدماء ومش حقيقي .
- ومين أقوي إنت ولا هو ؟
- لا ابوك طبعا يا يالا ..أنا أغلبهم كلهم .
- طيب تعرف تطير في الهوا وتطلع سعاع من عنيك ؟
- بتردد - لا معرفش
- وهو يحاول النزول - خلاص يبقي هم أقوي منك وهياكلوني لو مسيت .
- يا ابني الله يهديك ورايا شغل مفيش حد هيخطفك ولا هياكلك .
- لا اقعد معايا ونلعب ماتس كورة علي الكمبيوتر علسان أكسبك وأجيب أجوان كتيرة .
- لا أنا اللي بكسبك دايماً وإنت بتعيط وتقرفني .
-لا مس فاكر امبارح لما كسبتك - دول- وهو يشير بكلتا يديه .
- طيب لما أرجع من الشغل نلعب مع بعض للصبح ونكسب يوسف لما يرجع من المدرسة .
- وهو يبكي - لا مليس دعوة مس هتخرج .
- تحت إلحاحه خلعت ملابس الخروج مرة أخري وجلست معه نلعب سوياً وكلما أحرز
هدفاً فوجئت بقلم ساخن يزلزل وجهي الذي إحمر من كثرة الأهداف .
وتذكرت حالى وأنا صغير مثله كنت اجري في الظلام وأنا بمفردي وأشعر بمن يجري
خلفي وكلما أسرعت أسرع هو مما يزيد من خوفي ... وكنت دائماً استمتع بحكايات
الجدة والعم عن تلك المرأة الشريرة التي تهيم ليلاً تنادي بصوت مرعب علي ضحاياها
وتأخذهم إلي حيث لا نعلم .. وهذا العفريت الكامن تحت إحدي السواقي المهجورة
ممسكاً بمصباح في الليالي الكالحة السواد ... ثم عقدت مقارنة سريعة بين عفاريت
زمان وعفاريت اليومين دول.. وجدت أن التشابه كبير جداً بينهما.. علي الرغم من
تجسد الكثير منهم في صور أخري
وهنا انتبهت من ذكرياتي علي يد المقرود ابني وهي تحط بسلام علي خدي فلقد انتهت المباراة بفوزه .
ملحوظة / نسيت أقول إن حرف الشين عنده في خبر كان !! | |
|
